Ngawiti ingsun nglaras syi'iran
Kelawam muji dhawuh Pangeran
Kang paring rohmat lan kenikmatan
Rina wengine tanpa pitungan
Dhuh bala kanca pria wanita
Aja mung ngaji syariat blaka
Gur pinter ndongeng nulis lan maca
Tembe mburine bakal sengsara
Akeh kang apal Qur'an hadist'e
Seneng ngafirke marang liyane
Kafire dewe ndak digatekke
Yen isih kotor ati akale
Gampang kabujuk nafsu angkara
Ing pepaese gebyare ndonya
iri lan meri sugihe tangga
Mula atine peteng lan nistha
Ayo sedulur ja nglalekake
Wajibe ngaji sakpranatane
Nggo ngandelake iman tauhide
Baguse sangu mulya matine
Kang aran soleh bagus atine
Kerono mapan sari ngelmune
Laku thoriqat lan makrifate
Uga hakekat manjing rasane
Alqur'an qadim wahyu minulya
Tanpa tinulis bisa diwaca
Iku wejangan guru waskita
Den tancepake ing njero dhadha
Kumathil ati lan pikiran
Mrasuk ing badan kabeh jeroan
Mukjizat rasul dadi pedoman
Minangka srana manjinge iman
Kalawan Allah kang maha suci
Kudu rangkulan rina lan wengi
Ditirakati diriyadhohi
Dzikir la suluk jo nganti lali
Uripe ayem rumangsa aman
Dununge rasa tandha yen iman
Sabar narima najan pas-pasan
Kabeh tinakdir saking Pangeran
Kelawan kanca dulur lan tangga
Sing padha rukun aja dursila
Iku sunahe Rasul kang mulya
Nabi Muhammad panutan kita
Ayo ngalakoni sakkabehane
Allah kang bakal ngangkat drajate
Senajan asor tata dzohire
Ananging mulya maqom drajate
lamun palastra ing wekasane
Ora kesasar roh lan sukmane
Den gadhang Allah swarga manggone
Utuh mayite lan ulesane
Tidak ada komentar:
Posting Komentar